جربت تكون لله ؟؟

يا عم مش مهم التدين .. مدام جوه نضيف يبقى خلاص
أهم حاجة القلب يبقى كويس..
أهو إحنا ماشيين .. وهو حد واخد منها حاجة ..



أيوة طبعا حد واخد منها حاجة ..كلنا واخدين منها حاجات ..
واخدين منها حاجة كويسة عملناها في حياتنا .. واخدين دعوة صادقة .. واخدين صدقة جارية ..
قال صلى الله عليه وسلم..
( إذا مات ابن آدم انقطع عمله إلا من ثلاث ، صدقة جارية، أو علم ينتفع به ، أو ولد صالح يدعو له )


جربت تكون لله؟؟
كلك لله ..
قلبك وعقلك وجوارحك كلها..
حتى تفكيرك .. في حياتك وفي موتك ..
( قل إن صلاتي ونسكي ومحياي ومماتي لله رب العالمين )



كلنا عارفين الكلام ده .. شوية رغي وخلاص.. ومحدش بيطبق حاجة



لأ



مش شوية رغي.. ندخل على التطبيق العملي



إزاي أكون لله؟؟



& النيـــــــــــــة:
إنوي .. بس انت إنوي إن أي حاجة هعملها هتكون عشان ربنا..
دراستي.. شغلي .. بيتي.. كلامي.. أفعالي..
أي عمل أعمله .. قول فيه ( اللهم ابتغاء الأجر وابتغاء مرضاتك )
مش هتخسر حاجة .. قولها بس.. مرة في مرة



نويت ؟؟



مش كفاية ..



جدد النية .. تاني .. وتالت .. لحد ما تثبت ..



& الجــــــــــــــــــــوارح :
خلاص نويت .. الحمد لله ..
أعمل إيه دلوقتي.. ؟؟
الجوارح .. أصدق القول بالعمل..
قال صلى الله عليه وسلم ..
( الإيمان هو ما وقر في القلب ، وصدقه اللسان ، وعملت به الجوارح )
أصلي .. شوية سنن وفيها إيه؟؟ .. وعليهم شوية نوافل.. مش هيجرى حاجة .. ربع ساعة زيادة من وقتك لربنا .. كتير على ربنا؟؟
أصل أنا في الأجازة ببقى مكسل ..
معلش يا سيدي .. تعالى على نفسك شوية .. ربع ساعة بس.. سنة بعد المغرب وسنة قبل الفجر وشوية هنا وهنا .. خلاص خلصو ا ..





& الاتنين مع بعض:
أنا ماشي صح .. وبرضي ربنا .. ومش مقصر الحمد لله .. بس فيه مشاكل .. غرقان في مشاكل..
مش مهم
( ومن يتق الله يجعل له مخرجا )



بس ؟؟



لأ مش بس



تكملة الآية ( ويرزقه من حيث لا يحتسب )



الرزق بإيدين ربنا .. هو الي خلقك وهو اللي أكيد هيرزقك .. ويخرجك من كل مأزق إن شاء الله .. بس انت فوض الأمر لله واعمل اللي عليك
( اللهم قد فوضت أمري كله إليك )
..
الحمد لله .. ربنا كرمك .. ودلوقتي..



& الشكـــــــــــــــــر :
أنت صاحي من النوم .. الحمد لله.. أنت زي ما انت ..
.. فيه ناس بتنام مش بتصحى أصلا ... شكرته ؟؟
لأ
طيب.. كمل يومك عادي..



دخلت الحمام .. غسلت وشك .. الحمد لله فيه مية .. المية اللي انت بتسيبها مفتوحة دي .. فاكرها؟؟ أيوة أيوة اللي في يوم اتقطعت ومعرفتش تنزل من البيت ؟؟ افتكرتها..
شكرت ربنا على المية دي ؟؟



لأ
نسيت .. ما علينا.. برده كمل يومك عادي ..



نزلت رحت الشغل أو الكلية أو المدرسة .. ورجعت سليم الحمد لله .. كان ممكن يحصلك حاجة ومترجعش .. وصلت البيت .. انت وسط عيلتك وفي بيتك .. مامتك عملت أكلة مش بتحبها.. رحت مزعق وقالب وشك وطلبت ديليفري .. عادي.. بتحصل .. فكرت كام واحد غيرك مش لاقي حاجة ياكلها.. فكرت كام واحد غيرك مش لاقي بيت يستره .. فكرت كام واحد غيرك مرمي في الشارع مش عارف أصلا أهله مين..
شكرت ربنا؟؟
لأ ؟؟
لسة بتقول لأ ؟؟
( من قال في يوم : يارب لك الحمد كما ينبغي لجلال وجهك وعظيم سلطانك فقد أدى شكر يومه )



هاه؟؟ لسة مش مقتنع؟؟
ولا خلاص .. نويت تكون عيشتك وحياتك عشان ربنا.. نويت تكون كلك لله